على هامش يوم الضحك بوجدة .. أقسم بالله يلا باقي عندنا الحكرة فالبلاد
نظم يومه الثلثاء 10 يوليوز 2012 ، بساحة إعدادية باستور سابقا وعلى هامش
مهرجان الراي بوجدة ، يوم للضحك ، والضحك صراحة مفيد للصحة ، مفيد للروح
والنفس ، الضحك ترفيه وترفيح ، ترفيه للجمهور الذي نادرا ما يستفيد من
أنشطة ، وترفيح « للبراني » الذي يملأ حسابه البنكي من المال العام ، وكما
قال المغني صاحب النغمة المشهورة « خبز الدار ياكلو البراني » ، غير أن يوم
الضحك خرج عن المعهود هذه السنة فأبان أن وجدة لها مبدعيها وكفاءاتها من
كومديين متألقين شباب ، وإن غيب العديد من الفكاهيين بالجهة الشرقية
لحاجة في نفس المنظمين ، فان الثنائي لفهامة ، الثنائي الاوية ، والثنائي
حامدي أبدعوا كل بطريقته الخاصة، وتألق شباب وجدة من خلال اختيار مواضيع
تهم المعيش اليوم للساكنة، وبلغة الكوميديا الفاضحة ، فضح الكوميديون
اللجنة المنظمة لمهرجان الراي على ما يعاني منه الفنان المغربي « ولد
لبلاد » من تقزيم في التعامل ، حيث قال أحد المنشطين » البراني يخلص
بالملايين وولاد لبلاد بالعشرين درهم  بحال يلا موالفين بالتبراح  » .
صراحة تشجيع « ولاد لبلاد » والتصفيق لهم بحرارة ضروري ، لأن المشكل أن
البراني لم يعد يأكل خبز الدار فقط، بل أصبح يأكل الخبز الماء والهواء ،
ويترك مول الدار يتفرج جالسا على « الضس » ، وحتى لا يقال عنا بأننا حساد ،
فسأقدم لكم بعض ما سمعه مول الدار حينما تبرم بين الجمهور ودار ، وطلق
الرادار.
مول الدار : واش عاجبكوم مهرجان الراي ؟
ج : شويا
مول الدار : اش عاجبكوم فيه؟
ج : تحت الرعاية السامية لصاحب الجلالة الملك محمد السادس نصره الله،  ما
عندنا منقولو فيها
مول الدار : ومنبعد ؟
ج : الراية المغريبة .. العلام ديال البلاد ، لي خطرا خطرا كيطلعوه فوق
الخشبة ما عندنا ما نقولو فيه
مول الدار : ومنبعد ؟
ج : كايبقا فينا الحال
مول الدار : علاش؟
ج : حيت كيجيبو لينا شي مغنيين ما مغنيين حتى والو
مول الدار : بحلاش؟
ج : بحال هداك اللبناني لي ما لبناني حتى والو .. ما فنان حتى والو .. ما
حنجرة حتى والوا
مول الدار : والضحك ؟؟؟
ج : فيوم الضحك ضحكوا علينا وحق سيدس ربي
مول الدار : وعلاش قلتي وحق سيدي ربي ومقلتيش أقسم بالله
ج : حيت ماشي النغمة ديالنا
مول الدار : وولاد لبلاد
ج : ولاد لبلاد نوروا لبلاد ، وفاش كيهزوا علام لبلاد على كتافهوم كنفرح
مول الدار : علاش ؟
ج : حيت ماكنحسش بلي هازينو غير ديكور على حساب الصرف
مول الدار : هي الصرف موجود على الجهد ؟
ج : شي يدي الصرف وشي يدي التصرفيق ، وبنادم ما بغيش يفيق
مول الدار : الكومديين ديال وجدة تيضحكو
ج : أحسن من البراني ، بكا ولاد بلادي ولا تمهبيل ولاد بلادات الناس
مول الدار : سمعتك تتكلم على الحكرة ؟
مول الدار : أقسم بالله يلا باقي عندنا الحكرة فالبلاد
مول الدار : وفاش؟
ج : الحكرة فالخلاص .. الحكرة فالمعاملة .. الحكرة فالاختيار
مول الدار : مفهمتش
ج : علاش البراني تهلاو فيه .. يبينوا وجهو فواحد الشاشة كبيرة منين بدا
يخرف ، وولاد لبلاد يطيروا ويفرفرو .. ينقصوا ليهوم الصوت ديال الميكرو ،
القضية مخدومة .. وفيها إن ..
مول الدار : إن وأخواتها ؟
ج : إن لله وإن إليه راجعون .. وحسبنا الله هو نعم الوكيل
مول الدار : والخلاص
ج : البراني يخلصوه مزيان ، يجي يخيم نهارات قبل ، مبرع مع راصو ، وولاد
لبلاد لا خلاص زين لا شكون يسول ويسال
مول الدار : اخر كلمة الله يخليك تحت الذف وبلا رموز
ج : بلا رموز .. بلا تحت الذف أنا كنطالب بحاجة وحدة
مول الدار : تفضل؟
ج : كنطالب من المسؤوليين على مهرجان الراي يردوا لي فطو كوبي ديال
لكارط ناسيونال ديالي
مول الدار : خداو منك الفطوا كوبي؟
مول الدار : ايييه خداوها مني … ومفهمتش راصي… وماعيطوليش نشارك فالضحك
ج : ماخدمتش علاش كتكعررعلى فطو كوبي ديال لكارط ناسيونال؟
مول الدار : باش ما يمركيوش عليا بلي خدمت وانا ما خدامش
مول الدار : اخر كلمة بالزربة ؟
مول الدار : كنطالب من منظمين الراي رايهوم،  يحتارمو ولاد لبلاد ،
ومادام الميزانية خارجة من ظهر لبلاد
باراكا من نغمة خبز الدار ، الفنانة ديال لبلاد خاصهوم يخدمو فبلادهوم
،مخصش تشدهوم الفقصة من الضحك ، ايوا سير عاودها ليهوم …
مول الدار : بيناتنا .. أقسم بالله يلا باقي عندنا الحكرة فالبلاد.
الفنان الساخر محمد الشركي