رمضان مصباح الادريسي

مهداة لشباب القدس:

رَاهْ راه والنُّور تابَع مَمْشاهْ
فارَسْ القدس صامَد ، ربِّي يَرشَدْ مَسْعاه
ثْقيلْ الْهَمّْ شَا يَبْ، صْغيرْ مَ اللِّي تَلْقاهْ
زْمانْ ذْلِيلْ هَذا ؛ لَحْجَرْ كُلّْ ما تَتْرَجَّاه
*********
سُوقْ العَرْبانْ خالي، والمالْ يَجْري وَدْيانْ.
الخُوفْ راكَبْ، وْعَزّْ زْمانْ الْقَى مَلْقاهْ
حَتَّى لَعْيون غارَتْ ، وْ يَبْسَتْ لَغْصانْ فِ كُلّْ جْنانْ.
حَتىَّ الطِّيرْ هاجرْ،هارَبْ مَ الذَّلّْ طالَعْ لَسْماهْ
*********
يا الماشِي لْأَرْض الأدْيانْ طَالبْ لَمانْ
رَدّْ بالَكْ رَاهْ الصَّهْيونْ حَاكَمْ، وْ شُوفْ الدَّمْ اطْلاهْ
يا السَّاجَدْ فْ أرْضْ الصَّلاة وَنْبِيْ الله
بْيوتْ الذِّكر تَبْكيِ ،وْدَمْع العِين يَجري مَجْراهْ
**********
مَوْلِدْ النُّورْ عِيسى، وْ مَسْرَى أحْمَدْ العَدْنانْ
جْنانْ السَّلامْ حَرقوه، يْهُود ْ مَ أعْداءْ الله
رْكَبْ الطُّغيانْ زاهِي ،وَسْلاحُو ذْهَبْ العربان
سَلْسَلْ لَعْناقْ قاهَرْ، وْ كُلّْ مقهور يَتْبعْ مُولاهْ
***********
يَجْلد الصَّهيون ظَهْرْ الْعْريان، وْ يْهِينْ كُلّْ النَّسْوان
خُوفْ الحُكَّامْ شَاهَدْ؛كِتْسَكَّتْ صَبِي يَبْكي يَمَّاهْ
يَا رَبِّ دِيرْ لي هَبّْ الريح،حَتَّى لَلْقُدس نَشربْ مَنْ مَاهْ
يا ربي دير لي هب الريح، حتى لَشَّهِيد نَفرح مْعاهْ
************
شْبابْ العَزّْ ،فَرسان الصَّبرْ ، فَرْحُو لَلموتْ طَلبو مَلقاهْ
لا مَنْ يْغيثْ لا مَن يَنْصر ؛ حَتىَّ الّْلسانْ داخَلْ فَ جْواهْ
يا الهارَبْ باكِي ،بْخِيلْ بْمالو، ،يَصْبَحْ وْيَنْقَمْ الله
بَعْدْ القُدس تَخْسَرْ بَغداد،تَبْكي دِمَشْقْ ،زِدْ الحِجازْ يَبكي بَبْكاهْ
************
اشْهد اشهد يا الشَّاهَدْ، مَال الْعَربان يَجْري وِيدان
اشهد اشهد يا الشاهد مال العربان يَنْصَرْ اعْداه
الله يا بلاد الصلاة،بلاد الأقصى وعيسى ،فين عُمَرْ فِينْ الْأَيُّوبْ
يا رَبِّي واشْ هاذْ الغَمْرَة،مِين هاذْ القَهْرة ،الصّْغِيرْ يَحْمِي بَباهْ
صَبِيّْ يَحْمِي تاريخْ،هَرْبت نْسُورْ مَ الدِّيناصورْ،وَبْقىَ عُصْفُورْ
يَلْغِي بَلْغاهْ
القنيطرة ماي2018