بمناسبة عيد المسيرة الخضراء واسترجاع الاراضي المغربية من يد المستعمر الاسباني ، وهدية مني الى وطني الغالي والى صحرائنا العزيزة الى كل هذه الرقعة من جسدنا المغربي الى كل شبر من الارض والى كل حبة رمل ـ فحب الاوطان من الايمان ـ اهدي قصيدة زجلية بعنوان الصحرا ديالي

الصحرا ديالي

يا الرمال  لمذهبة

وين انايا خليت        قلبي عطشان

يا الصحرا لمهبلة

كثير من الناس        وانا فيهم ولهان

يا لبلاد لمعلبة

                       فيك عروك وويدان  رمال  الكثبان محاميد وغزلان

يا الارض لمعذبة

كل الناس ساسة وعقلا وكل حامل حس رهيف شاعر وفنان

يا لوطان لمقربة

كل بعيد  جاي يحن لوطنو ما يخلي حتى بلاصة وكل مكان

يا لبقاع لمكتبة

لي نكتب عليك كيما شلة من بقاع توشمت في قلبي بلاد العربان

يا لمكان لمعتبة

في الارض تاركة بصمة كيتمواج لبحر تلالي فيها سحر وتحنان

يا الصحرا الغالية

جيتيني ثمينة اكثر من كل عزيز ومن كل حجر لامع براق وكل البلدان

يا لرض لحنينة

انت امنا وين تهربي علينا وين نهربو عليك متماسكين معاك حتى لتاخير الزمان

يا التربة لمقلبة

انت عطية من مول الوطية هدية زينة من الرب المنان

يا الصحرا انت مغربية

بغا من بغا كره من كره انت الهيبة اللي عطاها نا ليلاه الحنان

يا لرض لمهبلاني

واش كاين شي واحد يفصلو جسمو على روحو ميت هو بلا حسبان

انت ربحي وراسمالي

بغا الصانع والتاجر ولا ما لابغاش ملك لكل لمغاربة من تاريخ زمان

انت لعروس

العايمة فالرمال الذهبية شديت ليك كل ذايق فن الطبيعة وصل الله على العدنان

انت ولهي وهبالي

انت فوك راسنا تاج مرصع بجواهر وذهب لؤلؤ او مرجان

انت روحي وانفاسي

شاد فيك وخا عليك نقاسي كبضة صحيحة وخا يشعل البركان

انت الطاوس

في لوانك زاهي وفرمالك باهي عطاك ربي الزين من شطوط بحور وحيتان

انت لوجود

في اعماقي موجود يا لي عليك نسخر ما عطاني ربي من وهبات وبالذات عيك النكران

انت منارتي وتضوي

علينا تربطنا مع خوتنا من الموريطان والسينيكال وجوهرة السودا وكلشي مفهوم و بان

بغاو يعزلونا على القارة

ذيك فكرة ما فيها حكمة اللي بغا يعزلنا دير فبالك يجي يوم ما تضنه فالحسبان

عمرك لا تكول نفكر

وحدي نضرب لعبار عندك لا تنسى عندنا سفينة متينة قايدينها رجال وربان

وصل الله على العدنان

هو ايمامنا مول الخير لعميم مول الفضل واللي وصنا نكونو خاوة

صف واحد نجابهو كل العديان

ماشي نخربو ديارنا بيدينا ذيك خدمة ما يديروها غير صحاب البهتان

 ما يرضى عليها

رب القدرة ما يرضى عليها عاقل مول بصيرة ما يرضى عليها سيد الفرسان

وصلى علنبي

في كلامي نختم ندعي لولاد وطني بالهنا السعادة وكثرة ليمان

  ويارب

تحفظ خاوتي من بلاد العربان

يبعدو كل نية سية ما يفرقهم كلام العديان

بفكر رزين

ندعي اولاد بلادي يديرو ليد في ليد هاذي قضية وطنية ما فيها خصومة ولا هجران

وندعي لوطني نعيشو في ضراه بالخير والهنا والرخا نستغلو الامن والامان

نبنيو جدار

صحيح ما يهزه لا برد ولا ريح شامخ كي اجبل في  وكفته يتحدى لزمان.

                                               شعر عبد القادر بنطيب

                                             عين بني مطهر في : يوليوز 2013