وليدات الميدان
زجل شعبي
وليدات الميدان
لحسن قناني
وليدات الميدان يا قرة لعيان
شفيتونا الغمة وجليتو لحزان
براءة وصمود صرخة وقضية
شجاعة وعناد حلم وتضحية
بالصم والكرداس درتو حيحاية
وبزز ملقرطاس عليتو الراية
حمرة كحلة بيضا مصبوغة بالدم
خليتو الفرعون كي اللفعة بلا سم
يضرب ويخطا ويولّي يكرم
شلا قنوات عيات ما تفهم
فتالي ولات تزاوك وتحشّم
باقي گنس البلطجة ما بغاشي يحشم
خزيت على طبيعة يدلّق ويشكّم
كي تفرا وتبان لازم يبلم
هذي حتمية فالتاريخ سدات
وهم الجبروت لازم يتهدّم
علّيتو لعلام يا زينة لولاد
وفضحتو لقزام خدام الموصاد
عرّيتو النفاق والهف والتبناد
وبيّنتو للكون ولكل العباد
بللي التاريخ المر لازم يتكتب
بالدم والإصرار مشي بالميداد
****
بحر المقهورين يا ناعس مزمان
إمتا طوفانك يتهلّك ويبان
يا بحر الهموم طوّل هذ النوم
إمتا موجاتك تكشكش وتعوم
هذي عشر سنين تتبع عشر سنين
هذا المشهد طال وطاحو السنين
كبرت لغبينة والحكرة سكّين
ينهش فحشانا بتغماض العينين
محنتنا محنة والعيشة تنين
يكشّر لنياب ويقطّب لجبين
****
فينكم يا لحرار فين الشهامة
فين أهل القلم فين الزعاما
خرجو ملخيران هذ الشي حشومة
حتى لاين تبقاو كيف الگزانات
تلفو وتدورو كابضاكم حمة
غي صبيان صغار دارو القيامة
وسيادنا لكبار كالسين كي القرمة
فالحين فالهدرة فالحين غي فالناب
وكي دوات الگارة كلشي راح وداب
****
العز والتبجيل لولاد الميدان
ولاد القاهرة اللي علاّو الشّان
هدّو گرون النجمة خلاوها تجذب
فسداسي وخماسي قيالة تضرب
تشالي بعصاها تحسبها عكرب
هيهات هيهات ما بقالها صاحب
شمس جديدة گدات موحال لتغرب
شمس جديدة گدات موحال لتغرب
لحسن قناني
Loading...
Aucun commentaire